தூத்துக்குடி மாநகராட்சிக்கு உட்பட்ட செயின்ட் மேரீஸ் மகளிர் கல்லூரி மற்றும் மாவட்ட காவல் கண்காணிப்பாளர் முகாம் அலுவலகம் அமைந்துள்ள சாலையில், சிறிதளவு மழை பெய்தாலே மழைநீர் தேங்கி நிற்பதால் வாகன ஓட்டிகளும், பொதுமக்களும் கடும் சிரமத்திற்கு ஆளாகி வருகின்றனர்.
இந்தச் சாலையை முறையாகப் பராமரிக்க ஒப்பந்தம் எடுத்த ஒப்பந்ததாரர், உரிய முறையில் பணிகளை மேற்கொள்ளாததே இப்பிரச்சினைக்குக் காரணம் எனக் குற்றம்சாட்டப்படுகிறது. இதுகுறித்து மாநகராட்சி நிர்வாகம் இதுவரை ஏன் உரிய நடவடிக்கை எடுக்கவில்லை என்றும், சம்பந்தப்பட்ட ஒப்பந்ததாரர் மீது நடவடிக்கை எடுக்க வேண்டும் என்றும் இந்து முன்னணி தூத்துக்குடி மாவட்டச் செயலாளர் கே.எஸ். ராகவேந்திரா வலியுறுத்தியுள்ளார்.
மேலும், மீண்டும் மழை பெய்யும்போது இந்தச் சாலையில் தண்ணீர் தேங்கும் நிலை ஏற்பட்டால், பொதுமக்களைத் திரட்டி இந்து முன்னணி சார்பில் மாநகராட்சி நிர்வாகத்தைக் கண்டித்து மாபெரும் ஆர்ப்பாட்டம் நடத்தப்படும் என்றும் அவர் எச்சரிக்கை விடுத்துள்ளார்.
