தேர்தல் தொடர்பான சிறப்பு தீவிர வாக்காளர் பட்டியல் திருத்தப் பணியான எஸ்.ஐ.ஆர். குறித்து காங்கிரஸ் உள்ளிட்ட எதிர்க்கட்சிகள் ஆதாரமற்ற மற்றும் தவறான குற்றச்சாட்டுகளை பொதுமக்களிடம் பரப்பி வருவதாக, தூத்துக்குடி தெற்கு மாவட்ட பா.ஜ.க. மாநில செயற்குழு உறுப்பினர் விவேகம் ரமேஷ் தெரிவித்தார்.
தூத்துக்குடி தெற்கு மாவட்ட பா.ஜ.க. அலுவலகத்தில் எஸ்.ஐ.ஆர். நடைமுறை தொடர்பாக நடைபெற்ற செய்தியாளர் சந்திப்பில் அவர் கூறியதாவது:
தற்போதைய சூழலில் காங்கிரஸ் மற்றும் எதிர்க்கட்சிகள் தேர்தல் ஆணையத்தின் செயல்பாடுகள் மற்றும் எஸ்.ஐ.ஆர். நடைமுறை குறித்து பல்வேறு குற்றச்சாட்டுகளை முன்வைத்து வருகின்றன. தேர்தல் ஆணையத்தின் அதிகாரம், செயல்பாடுகள் மற்றும் கட்டுப்பாடுகள் அனைத்தும் தேர்தல் விதிமுறைகளுக்கு உட்பட்டே மேற்கொள்ளப்பட்டு வருகின்றன.
தேர்தல் ஆணையத்தின் செயல்பாடுகள் குறித்து யார் வேண்டுமானாலும் கேள்வி எழுப்பலாம். ஆனால், ஆதாரமின்றி குற்றச்சாட்டுகளை முன்வைப்பதை தவிர்க்க வேண்டும். எஸ்.ஐ.ஆர். தொடர்பாக காங்கிரஸ் கட்சியும், ராகுல் காந்தியும் தவறான தகவல்களை மக்களிடம் பரப்பி வருவதாகவும், இதன் காரணமாக பல்வேறு பகுதிகளில் போராட்டங்கள் நடத்தப்பட்டு வருவதாகவும் அவர் தெரிவித்தார்.
“13 கோடி வாக்காளர்கள் நீக்கம்” என்பது தவறான தகவல்
எஸ்.ஐ.ஆர். நடைமுறை தேர்தல் ஆணையத்தின் அதிகார வரம்புக்கு உட்பட்டே செயல்படுத்தப்பட்டு வருகிறது. வாக்காளர் பட்டியலில் இடம்பெற்றுள்ள இறந்தவர்களின் பெயர்களை கண்டறிந்து, உரிய நடைமுறைகளின்படி அவற்றை நீக்குவது உள்ளிட்ட பணிகள் மேற்கொள்ளப்படுகின்றன. ஆனால், 13 கோடி வாக்காளர்கள் வாக்காளர் பட்டியலில் இருந்து நீக்கப்பட்டுள்ளதாக கூறப்படுவது தவறான குற்றச்சாட்டு என விவேகம் ரமேஷ் கூறினார்.
எஸ்.ஐ.ஆர். நடவடிக்கை பா.ஜ.க.வுக்கு சாதகமாக மேற்கொள்ளப்படுவதாக காங்கிரஸ் கட்சி கூறி வருவதும் தவறான தகவல் என அவர் தெரிவித்தார். எஸ்.ஐ.ஆர். தொடர்பாக தலைமைத் தேர்தல் ஆணையர் ஞானேஷ் குமார் வெளியிட்டுள்ள விளக்கங்களில், நடைமுறை தொடர்பான பல்வேறு விவரங்கள் தெளிவுபடுத்தப்பட்டுள்ளதாகவும் அவர் கூறினார்.
சிறுபான்மையினர் பெயர்கள் நீக்கம்? – பா.ஜ.க. மறுப்பு
சிறுபான்மை மக்களின் பெயர்கள் வாக்காளர் பட்டியலில் இருந்து நீக்கப்பட்டுள்ளதாக கூறப்படுவதும் ஆதாரமற்ற குற்றச்சாட்டு என விவேகம் ரமேஷ் தெரிவித்தார். 18 வயது நிறைவடைந்த அனைவரும் தேர்தல் ஆணையம் வகுத்துள்ள நடைமுறைகளின்படி வாக்காளர் பட்டியலில் சேர்வதற்கான வாய்ப்பு உள்ளதாகவும் அவர் கூறினார்.
குடும்ப உறுப்பினர்களின் பெயர்கள் வாக்காளர் பட்டியலில் இடம்பெறவில்லை என்றால், உரிய கோரிக்கை மனுவை அளித்து பெயரை சேர்க்க நடவடிக்கை எடுக்கலாம். அதேபோல், இறந்தவர்களின் பெயர்கள் பட்டியலில் இருந்து நீக்கப்படவில்லை எனில், அது குறித்தும் உரிய நடைமுறையில் முறையிடலாம்.
வாக்காளர் பட்டியல் தொடர்பாக ஏதேனும் குறைகள் அல்லது ஆட்சேபனைகள் இருந்தால், தேர்தல் ஆணையம் வகுத்துள்ள நடைமுறைகளின்படி மேல்முறையீடு செய்யும் வாய்ப்பும் உள்ளது. எனவே, பொதுமக்கள் எஸ்.ஐ.ஆர். குறித்து தேவையற்ற குழப்பம் அடையாமல், அதிகாரப்பூர்வ நடைமுறைகளை அறிந்து செயல்பட வேண்டும் என்றார்.
“பி.எல்.ஓ.க்களுக்கு அழுத்தம்” – குற்றச்சாட்டுக்கு மறுப்பு
எஸ்.ஐ.ஆர். பணிகள் அரசு ஊழியர்களான வாக்குச்சாவடி நிலை அலுவலர்கள் (பி.எல்.ஓ.) மூலம் மேற்கொள்ளப்பட்டு வருகின்றன. ஆனால், பி.எல்.ஓ.க்களுக்கு ஒரு கட்சியினர் அழுத்தம் கொடுத்து வருவதாக காங்கிரஸ் தரப்பில் கூறப்படுவது ஆதாரமற்ற குற்றச்சாட்டு என விவேகம் ரமேஷ் தெரிவித்தார்.
எதிர்க்கட்சிகள் குற்றச்சாட்டுகளை முன்வைப்பது ஜனநாயக உரிமை என்றாலும், ஆதாரமின்றி குற்றச்சாட்டுகளை பரப்பாமல் உண்மை நிலவரத்தை மக்களிடம் எடுத்துச் செல்ல வேண்டும். ஜனநாயக உரிமைகளுக்கு உட்பட்டு அனைத்து அரசியல் கட்சிகளும் செயல்பட வேண்டும். பொதுமக்களிடையே குழப்பத்தை ஏற்படுத்தும் வகையில் தவறான தகவல்களை பரப்பாமல், எஸ்.ஐ.ஆர். தொடர்பான உண்மை நிலவரத்தை தெரிந்துகொள்ள வேண்டும் என்றும் அவர் கேட்டுக்கொண்டார்.
பேட்டியின்போது பா.ஜ.க. மாவட்ட பொதுச் செயலாளர் ஏ.எம். ராஜேஷ், ஊடகப் பிரிவு மாவட்ட தலைவர் ஜெயக்குமார், கிழக்கு மண்டல தலைவர் சண்முக சுந்தரம் உள்ளிட்டோர் உடனிருந்தனர்.
