தூத்துக்குடி, செப்.24:
தூத்துக்குடியில் உள்ள வேலவன் ஹைப்பர் மார்க்கெட் தங்க நகை கடையில் ரூ.1 கோடி பணம் கேட்கப்பட்டதாக எழுந்துள்ள விவகாரம் தொடர்பாக, தமிழ்நாடு வணிகர் சங்க பேரமைப்பு மாநிலத் தலைவர் ஏ.எம்.விக்ரம் ராஜா நேரில் சென்று கடை மேலாளர் சரவணனிடம் விவரங்களைக் கேட்டறிந்தார். பின்னர் செய்தியாளர்களை சந்தித்து இவ்விவகாரம் குறித்து விளக்கமளித்தார்.
அப்போது அவர் கூறியதாவது:
“தமிழ்நாடு வணிகர் சங்க பேரமைப்பைப் பொறுத்தவரை, சாதி, மதம் உள்ளிட்ட வேறுபாடுகளுக்கு அப்பாற்பட்டு, வணிகர்கள் அனைவரையும் ஒரு தாய் பிள்ளைகளாகவே கருதுகிறோம். வணிகர்களுக்கு எந்தப் பிரச்சினை ஏற்பட்டாலும், அவர்களுக்கு பாதுகாப்பாக வணிகர் சங்கம் இருக்கும்.
இந்த விவகாரம் தொடர்பாக சிலர் சாதிய உணர்வுடன் சமூக வலைதளங்களில் கருத்துகளை வெளியிட்டு வருவது எனது கவனத்திற்கு வந்துள்ளது. இந்தப் பிரச்சினையை சாதிய கண்ணோட்டத்தில் பார்ப்பதை நண்பர்கள் தவிர்க்க வேண்டும். அதே நேரத்தில், ஏதேனும் வணிக நிறுவனம் தவறு செய்திருந்தாலும், அதையும் தமிழ்நாடு வணிகர் சங்க பேரமைப்பு தட்டிக் கேட்கும்.
எனவே, இந்த விவகாரத்தை வணிக நிறுவனம் தொடர்பான பிரச்சினையாக மட்டுமே பார்க்க வேண்டும். சாதி, மதம், மொழி, இனம் போன்றவற்றை இதில் கொண்டுவர வேண்டாம். மாநிலத்தில் எந்தப் பகுதியில் வணிகர்களுக்கு பிரச்சினை ஏற்பட்டாலும், வணிகர் சங்க பேரமைப்பு நேரில் சென்று அவர்களுக்கு ஆதரவாக நிற்கும். அதன்படியே தூத்துக்குடிக்கும் இன்று வந்துள்ளேன்.
இந்த விவகாரத்தில் சாதியை வைத்து பிரச்சினையை திசைதிருப்பாமல், வணிகர்கள் என்ற நோக்கத்துடன் அனைவரும் செயல்பட வேண்டும்.
மேலும், முத்தூட் பைனான்ஸ் போன்ற அடமான நிறுவனங்கள் தொடர்பாகவும் பல்வேறு நபர்கள் குற்றச்சாட்டுகளை முன்வைத்து வருகின்றனர். இதுதொடர்பாக தமிழ்நாடு வணிகர் சங்க பேரமைப்பு சார்பில் ஆய்வு மேற்கொள்ள உள்ளோம். நகைகளை அடகு வைப்பதில் என்னென்ன நடைமுறைகள் பின்பற்றப்படுகின்றன, வட்டி எவ்வளவு வசூலிக்கப்படுகிறது என்பது உள்ளிட்ட விவரங்கள் கணக்கிடப்படும்.
அதேபோல், அடகு வைத்த நகைகளைத் திருப்பிச் செலுத்துமாறு வாடிக்கையாளர்களுக்கு நிர்பந்தம் செய்யப்படுவதாகவும் தகவல்கள் வருகின்றன. இதுகுறித்தும் சம்பந்தப்பட்ட நிறுவனத்தில் ஆய்வு மேற்கொண்டு, உண்மை நிலையை கண்டறிந்து, முறையான நடவடிக்கை எடுக்க வேண்டும் என தமிழ்நாடு வணிகர் சங்க பேரமைப்பு வலியுறுத்தும்.
யாராக இருந்தாலும் தவறு செய்திருந்தால், தமிழ்நாடு வணிகர் சங்க பேரமைப்பு சட்டப்படி முறையான நடவடிக்கைகளை மேற்கொள்ளும்” என்றார்.
இந்த செய்தியாளர் சந்திப்பில் தமிழ்நாடு வணிகர் சங்க பேரமைப்பு நிர்வாகிகள் மற்றும் வணிகர் சங்க நிர்வாகிகள் உள்ளிட்ட பலர் கலந்து கொண்டனர்.
