தூத்துக்குடி மாநகராட்சி பகுதிகளில் குடிநீர் விநியோகத்தை சீராகப் பராமரிக்கும் வகையில், குடிநீர் குழாய் இணைப்புகளில் விதிமுறைகளுக்கு மாறாக மின்மோட்டார்கள் பொருத்தி தண்ணீர் உறிஞ்சுவோர் மீது கடும் நடவடிக்கை எடுக்கப்படும் என மாநகராட்சி ஆணையர் பிரியங்கா,எச்சரிக்கை விடுத்துள்ளார்.
தூத்துக்குடி மாநகராட்சி பகுதிகளுக்குத் தேவையான குடிநீர், மாநகரப் பகுதியில் இருந்து சுமார் 45 கிலோ மீட்டர் தொலைவில் உள்ள தாமிரபரணி ஆற்றுப் படுகையில் இருந்து நீர் உறிஞ்சு குழாய்கள் மூலம் எடுக்கப்படுகிறது. பின்னர் நவீன முறையில் சுத்திகரிக்கப்பட்டு, மேல்நிலை நீர்த்தேக்கத் தொட்டிகள் வாயிலாக சுழற்சி அடிப்படையில் மாநகராட்சி பகுதிகளுக்கு சீராக விநியோகம் செய்யப்பட்டு வருகிறது.
தற்போது கடுமையான வெயில் நிலவி வரும் நிலையிலும், மாநகராட்சி சார்பில் பொதுமக்களுக்கு முறையாகக் குடிநீர் வழங்கப்பட்டு வருகிறது. இருப்பினும், மாநகரின் சில பகுதிகளில் குடிநீர் விநியோகம் தடைபடுவதாகப் புகார்கள் எழுந்தன.
இதையடுத்து மாநகராட்சி அதிகாரிகள் மேற்கொண்ட கள ஆய்வில், சில கட்டிட உரிமையாளர்கள் மாநகராட்சி குடிநீர் குழாய் இணைப்புகளில் விதிமுறைகளுக்கு மாறாக நேரடியாக மின்மோட்டார்கள் பொருத்தி தண்ணீரை உறிஞ்சுவது கண்டறியப்பட்டுள்ளது. இதனால் குடிநீர் குழாய்களில் நீரின் அழுத்தம் குறைந்து, கடைசி பகுதிகளில் உள்ள குடியிருப்புகளுக்கு போதிய அளவில் குடிநீர் சென்றடையாத நிலை ஏற்படுவது தெரியவந்துள்ளது.
உடனடியாக மோட்டார்களை அகற்ற வேண்டும்
மாநகராட்சி குடிநீர் இணைப்புகளில் நேரடியாக மின்மோட்டார்கள் பொருத்தி தண்ணீரை உறிஞ்சுவது, குடிநீர் விநியோக உபவிதிகளுக்கு முற்றிலும் முரணானதாகும். எனவே, குடிநீர் குழாய் இணைப்புகளில் மின்மோட்டார்கள் பொருத்தியுள்ள கட்டிட உரிமையாளர்கள், அவற்றை உடனடியாக அகற்ற வேண்டும் என மாநகராட்சி சார்பில் அறிவுறுத்தப்பட்டுள்ளது.
இந்த அறிவுறுத்தலை மீறி தொடர்ந்து மின்மோட்டார்கள் மூலம் குடிநீர் உறிஞ்சுவது கண்டறியப்பட்டால், நடைமுறையில் உள்ள குடிநீர் விநியோக உபவிதிகள் மற்றும் தொடர்புடைய விதிகளின்படி கடும் நடவடிக்கை எடுக்கப்படும்.
அதன்படி, விதிமுறைகளுக்கு மாறாக பொருத்தப்பட்டுள்ள மின்மோட்டார்கள் பறிமுதல் செய்யப்படுவதுடன், சம்பந்தப்பட்ட குடிநீர் இணைப்புகள் உடனடியாகத் துண்டிக்கப்படும். மேலும், பெரும் அளவிலான அபராதம் விதிக்கப்படுவதோடு, தேவையான சட்டரீதியான நடவடிக்கைகளும் மேற்கொள்ளப்படும்.
எனவே, பொதுமக்கள் மாநகராட்சி குடிநீர் விநியோக விதிமுறைகளை முறையாகக் கடைப்பிடித்து, அனைவருக்கும் சீரான குடிநீர் கிடைப்பதற்கு ஒத்துழைக்க வேண்டும் என மாநகராட்சி ஆணையர் சி. பிரியங்கா, இ.ஆ.ப., கேட்டுக்கொண்டுள்ளார்.
