திருப்பரங்குன்றம் மலை தீபத்தூணில் கார்த்திகை தீபம் ஏற்றுவது காலங்காலமாகப் பின்பற்றப்பட்டு வரும் பாரம்பரிய வழிபாட்டு மரபாகும். மக்களின் மத நம்பிக்கையோடும், ஆன்மிகப் பாரம்பரியத்தோடும் தொடர்புடைய இந்த நடைமுறையை அரசியல் காரணங்களுக்காகத் தடுத்து நிறுத்துவது எந்த வகையிலும் ஏற்றுக்கொள்ள முடியாதது என்று வீ த லீடர் இயக்கத்தின் தலைவர் அண்ணாமலை தெரிவித்துள்ளார்.
இதுகுறித்து செய்தியாளர்களிடம் பேசியபோது
திருப்பரங்குன்றம் மலை தீபத்தூணில் கார்த்திகை தீபம் ஏற்றுவது என்பது நீண்டகாலமாகத் தொடர்ந்து வரும் வழிபாட்டு மரபாகும். இத்தகைய பாரம்பரிய நடைமுறையைத் தடுப்பதன் மூலம் மக்களின் மத நம்பிக்கையையும், வழிபாட்டு உரிமையையும் புண்படுத்தும் வகையில் அரசு செயல்படக் கூடாது.
கடவுள் மறுப்பு என்ற போலியான பிம்பத்தைக் கட்டமைப்பதற்காக முந்தைய திமுக அரசு கையாண்ட அதே அணுகுமுறையை தற்போதைய தவெக அரசும் தொடர்வது முற்றிலும் ஏற்புடையதல்ல. ஆட்சி மாறினாலும் மக்களின் மத நம்பிக்கைகள் மற்றும் பாரம்பரிய வழிபாட்டு உரிமைகளை மதிப்பதில் மாற்றம் இருக்கக் கூடாது.
இந்த விவகாரத்தில் மாண்புமிகு சென்னை உயர்நீதிமன்றத்தின் மதுரை அமர்வு தெளிவான உத்தரவைப் பிறப்பித்த பிறகும், அந்த உத்தரவை நடைமுறைப்படுத்துவதற்குப் பதிலாக மேல்முறையீடுகள் மற்றும் நிர்வாகத் தாமதங்கள் மூலம் தொடர்ந்து இழுத்தடிப்பது நீதித்துறையின் உத்தரவுகளுக்கும், பக்தர்களின் வழிபாட்டு உரிமைகளுக்கும் எதிரானதாகும்.
அரசின் பொறுப்பு ஒரு பிரச்சினையைத் தொடர்ந்து நீட்டிப்பது அல்ல. சட்டத்தின் அடிப்படையில் உரிய தீர்வை ஏற்படுத்தி, மக்களின் உரிமைகளைப் பாதுகாப்பதே அரசின் கடமையாகும்.
அனைத்து மதங்களைச் சேர்ந்த மக்களும் சகோதரத்துவத்துடனும், மத நல்லிணக்கத்துடனும் வாழ்ந்து வரும் திருப்பரங்குன்றத்தில் தேவையற்ற சர்ச்சைகளை உருவாக்கி, அமைதியைக் குலைக்கும் நடவடிக்கைகளுக்கு மாநில அரசே காரணமாகிவிடக் கூடாது.
ஆண்டுக்கு ஒருமுறை நடைபெறும் கார்த்திகை தீபத் திருவிழாவில், பக்தர்கள் ஒரு குழுவாக அமைதியான முறையில் சென்று தீபம் ஏற்றுவதால் யாருக்கு என்ன பாதிப்பு ஏற்படப் போகிறது? இதனை ஏன் தேவையற்ற பிரச்சினையாக மாற்ற வேண்டும் என்ற கேள்வியும் எழுகிறது.
எனவே, காலங்காலமாகத் தொடரும் பாரம்பரிய வழிபாட்டு உரிமையை அரசியல் மற்றும் நிர்வாகக் காரணங்களைக் கூறி இனியும் முடக்காமல், உயர்நீதிமன்ற உத்தரவை மதித்து, திருப்பரங்குன்றம் மலை தீபத்தூணில் கார்த்திகை தீபம் ஏற்றுவது தொடர்பான விவகாரத்திற்கு தவெக அரசு உடனடியாக முற்றுப்புள்ளி வைக்க வேண்டும்.
பக்தர்களின் நம்பிக்கைக்கும், பாரம்பரிய வழிபாட்டு உரிமைக்கும் மதிப்பளித்து அரசு உரிய நடவடிக்கை எடுக்க வேண்டும் என்று வலியுறுத்தியுள்ளார்.