ஜெம் கிரானைட்ஸ் நிறுவன உரிமையாளர் வீரமணி மீதான போக்சோ வழக்கில் விசாரணையை தீவிரப்படுத்தும் வகையில், சிறப்பு புலனாய்வுக் குழு (SIT) அமைத்து தமிழக அரசு உத்தரவிட்டுள்ளதாக தகவல் வெளியாகியுள்ளது.
இந்த வழக்கில் ஏற்கனவே மத்திய குற்றப்பிரிவு போலீஸார் விசாரணை நடத்தி வரும் நிலையில், வழக்கின் பின்னணி, இதுவரை நடைபெற்ற விசாரணை, வழக்கு தொடர்பான நடவடிக்கைகள் உள்ளிட்டவற்றை விரிவாக விசாரிக்கும் வகையில் SIT அமைக்கப்பட்டுள்ளது.
தேன்மொழி தலைமையில் SIT
சென்னை காவல்துறையில் கூடுதல் ஆணையர் அந்தஸ்தில் பணியாற்றும் ஐஜி தேன்மொழி தலைமையில் இந்த சிறப்பு புலனாய்வுக் குழு அமைக்கப்பட்டுள்ளதாக தெரிவிக்கப்பட்டுள்ளது.
சென்னை காவல்துறையில் இணை ஆணையர் அந்தஸ்தில் உள்ள டிஐஜி திஷா மிட்டல் உள்ளிட்ட அதிகாரிகளும் குழுவில் இடம்பெற்றுள்ளதாக கூறப்படுகிறது. மேலும், எஸ்.பி. அந்தஸ்திலான முத்தரசி மற்றும் கீதாஞ்சலி ஆகியோரும் SIT குழுவில் இடம்பெற்றுள்ளதாக தகவல் வெளியாகியுள்ளது.
இந்த குழு, வழக்கின் அனைத்து அம்சங்களையும் ஒருங்கிணைத்து விசாரிப்பதுடன், இதற்கு முன்பு நடைபெற்ற விசாரணையில் ஏதேனும் குறைபாடுகள் அல்லது தவறுகள் ஏற்பட்டுள்ளதா என்பது குறித்தும் ஆய்வு செய்யும் என எதிர்பார்க்கப்படுகிறது.
SIT அமைக்க அண்ணாமலை வலியுறுத்தியிருந்தார்
இந்நிலையில், வீ தி லீடர்ஸ் அமைப்பின் நிறுவனர் அண்ணாமலை, ஜெம் வீரமணி வழக்கில் கடந்த காலங்களில் விசாரணையை நீர்த்துப்போகச் செய்ய முயன்றதாக கூறப்படும் அனைவரையும் விசாரணைக்கு உட்படுத்தும் வகையில் உடனடியாக SIT அமைக்க வேண்டும் என்று செப்.23 அன்று வலியுறுத்தியிருந்தார்.
வழக்கில் பாதிக்கப்பட்டவர்கள், குறிப்பாக சிறார்களாக இருந்தவர்களின் அடையாளம் மற்றும் பாதுகாப்பு முழுமையாக பாதுகாக்கப்பட வேண்டும் என்றும் அண்ணாமலை தனது அறிக்கையில் வலியுறுத்தியிருந்தார்.
தற்போது தமிழக அரசு SIT அமைத்து உத்தரவிட்டுள்ளதாக வெளியாகியுள்ள தகவல், ஜெம் வீரமணி வழக்கின் விசாரணையில் அடுத்தகட்ட முக்கிய நடவடிக்கையாக பார்க்கப்படுகிறது. வழக்கில் தொடர்புடையதாக கூறப்படும் நபர்கள், இதுவரை மேற்கொள்ளப்பட்ட விசாரணை நடவடிக்கைகள் மற்றும் ஏதேனும் தவறுகள் நடைபெற்றுள்ளதா என்பது உள்ளிட்ட பல்வேறு அம்சங்கள் குறித்து SIT விசாரணை நடத்தும் என எதிர்பார்க்கப்படுகிறது.
