தமிழக முதலமைச்சர் விஜய் இன்று (நவம்பர் 16) டெல்லி செல்கிறார். காங்கிரஸ் மூத்த தலைவரும், முன்னாள் அகில இந்திய காங்கிரஸ் தலைவருமான சோனியா காந்தி எழுதியுள்ள சுயசரிதை நூல் வெளியீட்டு விழாவில் பங்கேற்பதற்காக அவர் டெல்லி பயணம் மேற்கொள்கிறார்.
சோனியா காந்தியின் Belonging: A Journey of Love என்ற சுயசரிதை நூலின் அதிகாரப்பூர்வ வெளியீட்டு விழா இன்று மாலை 6 மணிக்கு டெல்லியில் உள்ள ஐடிசி மௌரியா ஹோட்டலில் நடைபெறுகிறது. இந்த விழாவில் காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, பிரியங்கா காந்தி உள்ளிட்ட முக்கிய தலைவர்கள் பங்கேற்க உள்ளனர்.
சோனியா காந்தியின் தனிப்பட்ட அழைப்பின் பேரிலும், ராகுல் காந்தி தொலைபேசி வாயிலாக அழைப்பு விடுத்ததன் பேரிலும் முதலமைச்சர் விஜய் இந்த நிகழ்ச்சியில் பங்கேற்கிறார்.
மேகதாது அணை விவகாரம் முக்கியத்துவம்!
தமிழகத்திற்கும் கர்நாடகத்திற்கும் இடையே காவிரி நீர் பங்கீடு தொடர்பாக மீண்டும் சர்ச்சை எழுந்துள்ள நிலையில், விஜய்யின் டெல்லி பயணம் அரசியல் முக்கியத்துவம் பெற்றுள்ளது.
கர்நாடக துணை முதல்வர் டி.கே.சிவக்குமார், மேகதாது அணைத் திட்டத்தைச் செயல்படுத்துவதில் கர்நாடகத்தின் உரிமையை வலியுறுத்தி வருகிறார். இதற்கு தமிழக அரசு கடும் எதிர்ப்பு தெரிவித்து வருகிறது.
இந்தச் சூழலில், டெல்லியில் நடைபெறும் நூல் வெளியீட்டு விழாவில் விஜய் மற்றும் கர்நாடக துணை முதல்வர் டி.கே.சிவக்குமார் சந்தித்துப் பேசுவார்களா என்ற எதிர்பார்ப்பு எழுந்துள்ளது. மேலும், பிரதமர் மோடியைச் சந்தித்து மேகதாது அணைத் திட்டத்திற்கு மத்திய அரசு அனுமதி வழங்கக் கூடாது என்று விஜய் வலியுறுத்துவாரா என்ற கேள்வியும் எழுந்துள்ளது.
சோனியா காந்தி நூல் குறித்து அண்ணாமலை கருத்து!
இதற்கிடையே, வீ த லீடர்ஸ் (We The Leaders) இயக்கத்தின் நிறுவனத் தலைவரான கே.அண்ணாமலை, சோனியா காந்தியின் சுயசரிதை நூல் குறித்து தனது கருத்தைத் தெரிவித்துள்ளார்.
கோவையில் செய்தியாளர்களிடம் பேசிய அவர், சோனியா காந்தி வேறுபட்ட அரசியல் கொள்கையைக் கொண்ட தலைவராக இருந்தாலும், அவருடைய அரசியல் பயணத்தையும் அனுபவங்களையும் அறிந்துகொள்வது அவசியம் என்று குறிப்பிட்டுள்ளார்.
சோனியா காந்தியின் கேம்பிரிட்ஜ் பல்கலைக்கழக வாழ்க்கை தொடங்கி, ராஜீவ் காந்தியுடனான திருமண வாழ்க்கை, 1984 சீக்கியர்களுக்கு எதிரான கலவரம், நெருக்கடி நிலை, 2004-ல் பிரதமர் பதவியை ஏற்க மறுத்தது, புற்றுநோயுடனான போராட்டம் உள்ளிட்ட பல்வேறு அனுபவங்கள் நூலில் இடம்பெற்றுள்ளதாக அவர் தெரிவித்துள்ளார்.
நூலில் இடம்பெற்றுள்ள சில கருத்துகளை விவாதிக்கலாம் அல்லது வரலாற்றைத் தங்களுக்குச் சாதகமாகச் சித்தரிப்பதாக விமர்சிக்கலாம். இருப்பினும், பத்தாண்டுகளுக்கும் மேலாக காங்கிரஸ் கட்சிக்குத் தலைமை வகித்த சோனியா காந்திக்கு தனது அரசியல் பயணத்தைப் பதிவு செய்ய முழு உரிமை உள்ளது என்றும் அண்ணாமலை கூறியுள்ளார்.
அதே செய்தியாளர் சந்திப்பில் தமிழகத்தில் அதிகரித்து வரும் கொலைச் சம்பவங்கள், சட்டம் ஒழுங்கு பிரச்சினைகள் மற்றும் தவெக ஆட்சியின் செயல்பாடுகள் குறித்தும் அவர் விமர்சனங்களை முன்வைத்துள்ளார்.
காங்கிரஸ் – தவெக உறவில் புதிய அரசியல் நகர்வு?
தமிழகத்தில் தவெக ஆட்சி அமைப்பதற்கு காங்கிரஸ் ஆதரவு அளித்துள்ள நிலையில், முதலமைச்சர் விஜய்யின் இந்த டெல்லி பயணம் அரசியல் வட்டாரத்தில் கூடுதல் கவனத்தைப் பெற்றுள்ளது.
ஒருபுறம் தமிழகத்தின் காவிரி நீர் உரிமையைப் பாதுகாக்க வேண்டிய நிலை; மறுபுறம் கர்நாடகத்தில் காங்கிரஸ் ஆட்சி நடைபெற்று வருவதால் கூட்டணிக் கட்சிகளுக்கு இடையே எழுந்துள்ள அரசியல் முரண்பாடு என விஜய்க்கு இந்தப் பயணம் முக்கியமானதாகப் பார்க்கப்படுகிறது.
இன்று பிற்பகல் சென்னையிலிருந்து தனி விமானம் மூலம் டெல்லி செல்லும் விஜய், சோனியா காந்தியின் நூல் வெளியீட்டு விழாவில் பங்கேற்றுவிட்டு இரவே சென்னை திரும்பத் திட்டமிட்டுள்ளார்.
முதலமைச்சரின் இந்த டெல்லி பயணத்தில் காவிரி நீர் உரிமை தொடர்பாக என்ன நடவடிக்கை எடுக்கப்படும்? காங்கிரஸ் தலைவர்களுடனான சந்திப்பு தமிழக அரசியலில் என்ன தாக்கத்தை ஏற்படுத்தும்? என்பது அரசியல் வட்டாரத்தில் எதிர்பார்ப்பை ஏற்படுத்தியுள்ளது.