தூத்துக்குடி சங்கரப்பேரி ஹவுசிங் போர்டு பகுதியில் பயன்பாடின்றி சிதிலமடைந்து, இடிந்து விழும் நிலையில் காணப்படும் பழைய மேல்நிலை நீர்த்தேக்கத் தொட்டியை அப்புறப்படுத்த மாநகராட்சி நிர்வாகம் நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
சங்கரப்பேரி ஹவுசிங் போர்டு குடியிருப்பு பகுதியில் பல ஆண்டுகளுக்கு முன்பு அமைக்கப்பட்ட மேல்நிலை நீர்த்தேக்கத் தொட்டி தற்போது பயன்பாடின்றி காட்சிப்பொருளாக உள்ளது. முறையான பராமரிப்பின்றி நீண்ட காலமாக காணப்படும் இந்தத் தொட்டியின் தூண்களின் அடிப்பகுதிகள் சிதிலமடைந்துள்ளதுடன், பல இடங்களில் கான்கிரீட் பெயர்ந்து இரும்புக் கம்பிகள் வெளியில் தெரியும் வகையில் காணப்படுகின்றன.
குறிப்பாக, தொட்டியை தாங்கி நிற்கும் தூண்களில் அரிப்பு ஏற்பட்டு, கம்பிகள் எலும்புக்கூடு போன்று வெளிப்பட்டுள்ளன. இதனால் தொட்டி மற்றும் அதன் கட்டுமானப் பகுதிகள் எந்த நேரத்திலும் இடிந்து விழும் அபாயம் இருப்பதாக அப்பகுதி மக்கள் அச்சம் தெரிவிக்கின்றனர்.
மேலும், இரவு நேரங்களில் இந்தத் தொட்டியைச் சுற்றியுள்ள பகுதிகளில் சமூக விரோத செயல்களில் ஈடுபடுபவர்கள் கூடுவதாகவும், மது அருந்துவதற்காக சிலர் அப்பகுதியை பயன்படுத்துவதாகவும் கூறப்படுகிறது. இதனால் இரவு நேரங்களில் பெண்கள், குழந்தைகள் உள்ளிட்ட பொதுமக்கள் அந்தப் பகுதி வழியாக செல்ல அச்சப்படும் நிலை ஏற்பட்டுள்ளது.
அதேபோல், பகல் நேரங்களிலும் குறிப்பாக விடுமுறை நாட்களில் சிறுவர்கள் ஆபத்தை உணராமல் சிதிலமடைந்த நீர்த்தேக்கத் தொட்டியின் அருகே விளையாடி வருகின்றனர். எதிர்பாராத வகையில் கட்டுமானப் பகுதி இடிந்து விழுந்தாலோ அல்லது கான்கிரீட் மற்றும் கட்டுமானப் பொருட்கள் பெயர்ந்து விழுந்தாலோ உயிர்ச்சேதம் ஏற்படும் அபாயம் உள்ளது.
எனவே, அசம்பாவிதம் ஏற்பட்டு உயிரிழப்பு அல்லது காயம் ஏற்படும் முன்பாக, சங்கரப்பேரி ஹவுசிங் போர்டில் பயன்பாடின்றி சிதிலமடைந்துள்ள பழைய மேல்நிலை நீர்த்தேக்கத் தொட்டியை மாநகராட்சி அதிகாரிகள் நேரில் ஆய்வு செய்ய வேண்டும். பொதுமக்களுக்கு ஆபத்தை ஏற்படுத்தும் நிலையில் இருந்தால், பாதுகாப்பு நடவடிக்கைகளை மேற்கொண்டு, அந்தத் தொட்டியை இடித்து அகற்றுவதற்கு உரிய நடவடிக்கை எடுக்க வேண்டும் என அப்பகுதி மக்கள் வலியுறுத்தியுள்ளனர்.
