தாராபுரம் சட்டமன்ற தொகுதி இடைத்தேர்தல் பிரசாரத்துக்காக முதலமைச்சர் விஜய் செல்வதையொட்டி, கோயம்புத்தூர், அவிநாசி, தாராபுரம் உள்ளிட்ட பகுதிகளில் நாளை நாள் முழுவதும் ஏராளமான போக்குவரத்து மாற்றங்கள் செய்யப்பட்டுள்ளதாகத் தெரிகிறது. இதனால் பொதுமக்களின் இயல்பான பயணம் பாதிக்கப்படுவதாக, வீ த லீடர் இயக்கத்தின் தலைவர் அண்ணாமலை கண்டனம் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது:
ஒரு முதலமைச்சரின் பாதுகாப்பு முக்கியமானது என்பதில் மாற்றுக்கருத்து இல்லை. ஆனால், பாதுகாப்பு ஏற்பாடுகள் என்ற பெயரில் ஆயிரக்கணக்கான பொதுமக்களின் இயல்பான பயணத்தையும், அன்றாட வாழ்க்கையையும் பாதிக்கும் வகையில் ஒரு நாள் முழுவதும் போக்குவரத்து கட்டுப்பாடுகள் விதிப்பது கடுமையான கண்டனத்துக்குரியது.
மருத்துவமனைக்கு செல்ல வேண்டியவர்கள், வேலைக்குச் செல்ல வேண்டியவர்கள், பள்ளி மற்றும் கல்லூரி மாணவர்கள், வியாபாரிகள் என தினசரி அந்தச் சாலைகளை நம்பியிருக்கும் பொதுமக்கள், முதலமைச்சரின் தேர்தல் பிரசாரத்துக்காக பாதிக்கப்படும் நிலை ஏற்படக்கூடாது.
மக்களை சந்திப்பதற்காக செல்லும் முதலமைச்சரின் பயணம், அதே மக்களுக்கு பல மணி நேர சிரமத்தை ஏற்படுத்துவது எந்த வகையான மக்கள் ஆட்சி? என அண்ணாமலை கேள்வி எழுப்பியுள்ளார்.
மக்களை சந்திக்க வரும் முதலமைச்சர் முதலில் மக்களின் சிரமத்தை புரிந்துகொள்ள வேண்டும். பொதுமக்களுக்கு பாதிப்பு ஏற்படாத வகையில் நிகழ்ச்சிகளை திட்டமிடுவதுதான் நல்ல நிர்வாகத்தின் அடையாளமாக இருக்க வேண்டும்.
தேர்தல் பிரசாரத்துக்காக அரசு நிர்வாகத்தின் முழு இயந்திரமும் பொதுமக்களை கட்டுப்படுத்தும் வகையில் பயன்படுத்தப்படுவதை தவிர்க்க வேண்டும். பொதுமக்களின் அன்றாட வாழ்க்கை பாதிக்காத வகையில் பாதுகாப்பு மற்றும் போக்குவரத்து ஏற்பாடுகளை மேற்கொள்ள வேண்டும் என்றும் அண்ணாமலை வலியுறுத்தியுள்ளார்.
