அண்ணல் மகாத்மா காந்தியடிகளின் 157-வது பிறந்த தினமான காந்தி ஜெயந்தி மற்றும் சர்வதேச அகிம்சை தினம், பெருந்தலைவர் காமராஜரின் 51-வது நினைவு தினம் ஆகியவற்றையொட்டி, தூத்துக்குடி வடக்கு மாவட்ட திமுக சார்பில் காந்தியடிகள் மற்றும் காமராஜர் சிலைகளுக்கு மாலை அணிவித்து மரியாதை செலுத்தும் நிகழ்ச்சி நடைபெற்றது.
தூத்துக்குடி பழைய மாநகராட்சி வளாகத்தில் அமைந்துள்ள அண்ணல் காந்தியடிகள் சிலைக்கும், பெருந்தலைவர் காமராஜர் சிலைக்கும் தூத்துக்குடி வடக்கு மாவட்ட திமுக மாவட்ட துணைச் செயலாளர் ராஜ்மோகன் செல்வின் தலைமையில் மாலை அணிவித்து மரியாதை செலுத்தப்பட்டது. தொடர்ந்து, வ.உ.சி. மார்க்கெட் முன்பு அமைந்துள்ள பெருந்தலைவர் காமராஜரின் திருவுருவச் சிலைக்கும் மாலை அணிவித்து மரியாதை செலுத்தினர்.
நிகழ்ச்சியில் கிழக்கு மண்டலத் தலைவர் கலைச்செல்வி, திமுக பொதுக்குழு உறுப்பினர் கோட்டு ராஜா, செல்வராஜ், மருத்துவர் அணி அருண்குமார், மாமன்ற உறுப்பினர் சரவணகுமார், வழக்கறிஞர் ரூபராஜா, பொன்ராஜ், மகளிர் அணி கவிதா உள்ளிட்ட திமுக நிர்வாகிகள், அணிகளின் பொறுப்பாளர்கள் மற்றும் தொண்டர்கள் கலந்து கொண்டனர்.
