தூத்துக்குடி, அக்.7:
பிரதமர் நரேந்திர மோடியின் 25 ஆண்டுகால பொதுவாழ்க்கைப் பயணத்தை நினைவுகூரும் வகையில், பாரதிய ஜனதா கட்சி சார்பில் நாடு முழுவதும் நடத்தப்பட்டு வரும் ‘சேவா ஜோதி’ பேரணி தூத்துக்குடியில் நடைபெற்றது.
பாஜக இளைஞர் அணி மாவட்டத் தலைவர் சக்திவேல் தலைமையில் நடைபெற்ற இந்தப் பேரணியில், அவர் ‘சேவா ஜோதி’ தீபத்தை ஏந்தியபடி முன்னிலை வகித்தார். பேரணியில் பங்கேற்ற நிர்வாகிகள் மற்றும் தொண்டர்கள் தேசியக்கொடி, பாஜக கொடிகளை ஏந்தியபடி சென்றனர்.
பிரதமர் நரேந்திர மோடியின் பொதுவாழ்க்கைப் பயணம், மக்கள் நலத்திட்டங்கள் மற்றும் சமூக சேவைப் பணிகளை விளக்கும் பதாகைகளும் பேரணியில் இடம்பெற்றன. பிரதமர் மோடியின் 25 ஆண்டுகால பொதுவாழ்க்கையை நினைவுகூர்வதுடன், மக்கள் நலன் மற்றும் சமூக சேவையின் முக்கியத்துவத்தை பொதுமக்களிடம் எடுத்துரைப்பதே பேரணியின் நோக்கம் என பாஜக நிர்வாகிகள் தெரிவித்தனர்.
2047 இலக்கை வலியுறுத்தி...
இந்தியாவின் சுதந்திரத்தின் நூற்றாண்டான 2047-க்குள் இந்தியாவை வளர்ச்சியடைந்த நாடாக மாற்றுவதற்கான முயற்சிகளில் பொதுமக்களின் பங்களிப்பு அவசியம் என்பதையும் பேரணியில் வலியுறுத்தினர். நாட்டின் வளர்ச்சி மற்றும் சமூக முன்னேற்றத்துக்கு அனைவரும் தங்களது பங்களிப்பை வழங்க வேண்டும் என்ற கருத்து முன்வைக்கப்பட்டது.
பேரணியில் பாஜக தேசிய செயலாளர் மா. வெங்கடேசன், மீனவர் அணி மாநிலத் தலைவர் சீமா பாலு, தூத்துக்குடி தெற்கு மாவட்டத் தலைவர் சித்ராங்கதன், வடக்கு மாவட்டத் தலைவர் சரவண கிருஷ்ணன், மாவட்ட பொதுச் செயலாளர்கள் ஏ.எம். ராஜேஷ், ஆறுமுகம், செல்வராஜ், மாவட்ட துணைத் தலைவர்கள் சிவராமன், இசக்கிமுத்து, காளிராஜா, மாசானம், சண்முகசுந்தரம், வடக்கு மாவட்ட பொதுச் செயலாளர் வீரா உள்ளிட்ட பல்வேறு அணிகளின் நிர்வாகிகள் மற்றும் கட்சித் தொண்டர்கள் கலந்து கொண்டனர்.
