தூத்துக்குடி மாநகரப் பகுதிகளில் பொதுமக்களுக்கும், போக்குவரத்திற்கும் இடையூறாக அமைக்கப்படும் தற்காலிக மற்றும் நிரந்தர ஆக்கிரமிப்புகளை மாநகராட்சி நகரமைப்பு பிரிவினர் அவ்வப்போது அகற்றி வருகின்றனர்.
குறிப்பாக, விதிமுறைகளை மீறி வைக்கப்படும் விளம்பரப் பதாகைகள், பேனர்கள் மற்றும் சுவரொட்டிகள் உடனுக்குடன் அகற்றப்படுவதுடன், அவற்றை வைத்துள்ள தொடர்புடைய நபர்களுக்கும் அபராதம் விதிக்கப்பட்டு வருகிறது.
இந்நிலையில், கடந்த வாரம் மாநகரப் பகுதிகளில் பொதுமக்கள் மற்றும் வாகன ஓட்டிகளின் கவனத்தை திசை திருப்பும் வகையில், விதிமுறைகளுக்கு முரணாக ஒட்டப்பட்டிருந்த சுவரொட்டிகளை மாநகராட்சி அதிகாரிகள் அகற்றினர். மேலும், சம்பந்தப்பட்ட நிறுவனத்திற்கு ரூ.10 ஆயிரம் அபராதம் விதிக்கப்பட்டுள்ளது.
எனவே, பொதுமக்கள் மற்றும் வர்த்தக நிறுவனங்கள் மாநகராட்சியின் அனுமதியின்றி விதிமுறைகளை மீறி விளம்பரப் பதாகைகள், பேனர்கள் அமைத்தல் மற்றும் சுவரொட்டிகள் ஒட்டுவதை முற்றிலும் தவிர்க்க வேண்டும்.
மாநகராட்சியின் விதிமுறைகளைப் பின்பற்றி செயல்படுவதுடன், ஆக்கிரமிப்புகள் மற்றும் விளம்பரப் பலகைகள் தொடர்பாக மாநகராட்சி மேற்கொள்ளும் நடவடிக்கைகளுக்கு பொதுமக்கள் முழு ஒத்துழைப்பு வழங்க வேண்டும் என மாநகராட்சி ஆணையர் சி. பிரியங்கா தெரிவித்துள்ளார்.